Vande Ooren.
’T Ghehoor wort ghecrenckt door vercoutheyt / oft vervuyltheyt in de ooren / oft verstoptheyt van grove humeurĕ des breyns. Maer oly van bitter Amandelen ende oly van persick kernen met wat catoens inde ooren gedaĕ opent die conduyten ende is goet voor’t verlooren ghehoor. Ende oock ist seer goet dat men Isop / Alsem / Poley (*) siede in water / ende datmen over dien dompe de ooren houde / dat is goet voor’t ghehoor / ende om de wormkes daer uit te verdrijven. ‘Tgehoor heeft zijn vermakelijckeyt in vrolijcke divisen / lustig leerlijcke Liedekens te singhen / ende snaren spel te hooren spelen.
Van ’t riecken.
Die sijn ghesontheyt bemint sal hem wachten van leelijcken stanc te riecken / als vă keerssen eerst uit ghedaen oft inde pijp bernende / of stanc in’t vier oft vuyle lampen: dat is al quaet / en dat soude een mensche lichtelijc een sieckte af crijgen als coortse oft peste. Maer lieflijcke welrieckende dingen te riecken verfraeyen des menschen hert en sinnen / als sijn Roosen / Naghelen (*) / Lavendel bloemen / Mey bloemen. Tegens verloorĕ reucke is goet ghestooten Nighel (*) saet daer aen geroken.
Vanden Longen ende Borst.
Die Longen sijn lecker ende hebben geerne soet ende versaefte dinghen / als soete-melck ghemenght met suycker / witte maeghdĕ- honigh om te slicken gesuykerde Amandelen / stock suycker / blauw rasijnen / Dodickse vijgĕ / soet hout. Maer gesouten vleesch / peckel haringh / ende alle scherpe suyre dinghen : alsoock den roock zijn der Longen contrarie. Nieuwe soete wijn opghewelt met Carentĕ en stock suycker en daer altemet wat af gebesicht helpt den crop ende den Longen. Ysope
